TÍTULO VI

ÓRGANOS DE FUNCIONAMENTO

ARTIGO 8. AS AGRUPACIÓNS.

A Agrupación é a organización de base do Partido. É a referencia territorial e sectorial das/os comunistas e estructúrase nunha demarcación territorial, de sector e de centro de traballo, establecéndose marcos de colaboración entre a estructura territorial e a sectorial que permita a coordinación de tódolas/os comunistas que actúen nun mesmo eido.

Constitúe o marco de estudio, reflexión e debate teórico-político colectivo que serve á proposta comunista, así como de impulso ó traballo das/os comunistas nos movementos sociais e no movemento obreiro.

A Agrupación reunirase en asambleas sempre que sexa preciso, a instancia do comité de dirección ou a petición do 10% da afiliación, recomendándose unha periodicidade mínima de unha vez cada dous meses.

Anualmente celebrarase unha asamblea extraordinaria para face-lo balance do ano e proceder á elección do comité directivo.

Cada Agrupación, sen prexuízo das suscripcións individuais das/os seus/súas membros, suscribirase a “Mundo Obrero” e “Nuestra Bandera”.

ARTIGO 9. OS COMITÉS

Os Comités, nos seus distintos niveis, son órganos elexidos que asumen a función de coordinar e orienta-las propostas do Partido. Están obrigados a desenvolver e pór en práctica as resolucións propostas que maioritariamente se decidiran nas asambleas e órganos correspondentes ó seu eido e superiores. Os acordos non poderán contradecir os dos órganos superiores.

A súa elección faise nas asambleas correspondentes ó seu eido ou, no seu caso, nas do eido inmediatamente inferior.

O número das/os seus/súas membros fíxase de xeito flexible dacordo coas funcións políticas definidas nos Congresos. O Partido traballará para que nos órganos de dirección, a tódolos niveis, ningún dos dous sexos supere o 60% das/os seus/súas membros.

No caso de baixas ou renovación de cargos, cada organización cubrirá as vacantes, e nos casos de Agrupación deben seren ratificados pola asamblea.

ARTIGO 10. O COMITÉ CENTRAL

O Comité Central é o órgano superior do Partido entre Congresos, asume no grado máximo as obrigas derivadas das resolucións congresuais e as das Conferencias Nacionais, amais de tódalas obrigas relativas a impulsa-la política do Partido e a atención e coordinación de tódolas/os membros e órganos.

Como órgano superior de goberno, representación, administración e disposición do Partido, ten as máis amplas facultades que en dereito se requiran, sen limitación para realizar calquera acto ou negocio xuridico e para a plena actuación ante os tribunais de calquera clase e xurisdicción no eido de Galicia, poidendo otorgar toda clase de poderes ou delega-las facultades relacionadas –comprendida esta última- nos órganos do Partido, así como revocar unhas e outras.

O Comité Central está composto polas/os membros elexidas/os no Congreso Nacional.

Os Estatutos da XCG determinarán o procedemento de elección e revocación das/os súas/seus representantes.

O Comité Central determinará o número que corresponde á XCG.

O Comité Central organizará as responsabilidades ou comisións que precise.

O Comité Central elexirá dentre as/os seus/súas membros a representación correspondente no Comité Federal do PCE.

O Comité Central reunirase cantas veces o requira a situación política, cun mínimo de 6 veces ó ano

As reunións convocanse polo Comité Executivo ou a petición de 1/3 das/os suas/seus membros.

A estas reunións poden asistir, con voz pero sen voto, persoas invitadas que teñan relación coas materias a tratar.

Os cargos políticos remunerados terán a duración temporal da lexislatura política do Comité Central.

Para a contratación de administrativas/os utilizarase o sistema de oposición restrinxida e pública no Partido. Para elo constituirase un tribunal composto por 5 membros do Comité Central.

ARTIGO 11. A CONFERENCIA DO PCG.

O Comité Central celebrará Conferencias Nacionais para o debate e ulteriores propostas sobre temas políticos, con carácter monográfico, cantas veces o requiran os acontecementos e, alo menos unha vez ó ano.

As Conferencias Nacionais son convocadas polo Comité Central.

A ellas asisten as/os membros do Comité Central e as/os membros elexidas/os, seguindo a normativa que aprobe este.

A Conferencia Nacional non terá competencias para a elección de órganos, nin sobre aspectos estrictamente organizativos.

En calidade de invitados, con voz e sen voto, poden asistir persoas que garden relación con os temas a debate, a proposta do Comité Central.

ARTIGO 12. ASESORAMENTO FINANCIEIRO.

Para o asesoramento sobre a financiación do Partido e o correcto cumplimento das obligacións contables e fiscais, o Comité Central nomeará unha comisión de carácter técnico e consultivo que terá as seguintes funcións:

a.- Revisa-las contas e balances presentados, sinalando os erros ou imperfeccións.

b.- Examina-los presupostos e plans de financiación, informando sobre desviacións ou incorreccións.

c.- Aconsellar sobre posibles melloras na economía ou financiación, conservación do patrimonio ou calquera outra medida pertinente nese eido.

d.- Para a elaboración deses informes, disporán dos datos precisos que lle suministren as/os responsables de finanzas dos diferentes eidos.

e.- Fomenta-la cotización das cuotas da afiliación por domiciliación bancaria.

ARTIGO 13. COMITÉ EXECUTIVO DO COMITÉ CENTRAL.

Comité executivo asegura as tarefas de dirección do Partido entre reunión e reunión do Comité Central ante o que responde e asegura o debate político sobre temas monográficos e de coxuntura política. A súa composición decidirase no Comité Central a proposta da/o Secretaria/o Xeral..

ARTIGO 14. A/O SECRETARIA/O XERAL.

Será elexida/o polo Comité Central electo no Congreso Nacional.

Corresponde a/o Secretaria/o Xeral asegura-la dirección e coordinación do traballo colectivo; preside as reunións do Comité Central e do Comité Executivo podendo, circunstancialmente, delega-la presidencia destas reunións noutra/o membro do Comité Central.

No funcionamento público do PCG é a/o seu/sua representante máxima/o, salvo no periodo de celebración do Congreso Nacional.

ARTIGO 15.

Para o funcionamento habitual do Partido é indispensable que algúns/has afiliadas/os realicen plena adicación.

A súa selección ou revocación corresponde ó Comité Central a proposta do Comité Executivo, e en todo caso, con notificación ó Comité Federal do PCE.

A súa vinculación co Partido acomodarase á normativa xeral sobre relación laboral ou profesional que corresponda, en todo caso, as contratacións deberán axustarse á Política sobre contratación laboral do Partido.